In zien openingswoord had Hiemstra lof veur wat de ondernemers doen en wees hij d'r op hoeveul voedsel d'r in de eigen umgeving maakt wordt; volgens hum mogen inwoners daor vaker van genieten en van profiteren. Bie verschillende producten op tafel lagen kaarties mit de tekst ‘Lokaal smaakt beter’.
Het ontbijt is een traditie van de Ondernemersvereniging Rolde en omstreken; bakker Ko Pots schreef d'r ruum vieftien jaor geleden het eerste draaiboek veur. Op tafel stonnen onder meer broodies mit allerlei beleg, eieren, fruit en drinken, en het meeste daorvan kwam van ondernemers uut Rolde en umgeving.
Later op de morgen ston de peerdenmarkt op het programma, van 11.00 tot 17.00 uur in het centrum van Rolde en veur het eerst op een zundag. Tot vorig jaor heurde die bie de marktdinsdag, maor de OVVR, die de Roldermarkt organiseert, verplaotste de markt omdat het steeds lastiger werd om peerdenhandelaren naor Rolde te kriegen. De vereniging verwacht dat op zundag meer luu tied hebben om peerden, pony's en ezels te brengen of te kopen.
De feestweke, mit as thema ‘Een Technische Roldermarkt’, loopt van donderdag 3 tot en mit dinsdag 8 september. Op dinsdag is de Roldermarkt zölf, mit de warenmarkt en de Landbouw- en Groenbeurs, waor dit jaor veur het eerst een herhalingscursus veur de spuitlicentie geven wordt. De cursus hef plek veur zestig agrariërs en andere licentiehouders en giet over nauwkeuriger warken tegen onkruud en plagen, mit minder bestrijdingsmiddels.