Rolder zandverstuiving
Een open zandvlakte in het bos van de Boerdennen, waor Roldenaren vrogger feest vierden en kinder speulden. Sinds 2016 wordt de verstuiving hersteld.
Generaties Roldenaren kennen de zandverstuiving van feesten, sportwedstrijden en schoolreisies. Ok kinder uut Groningen kwamen massaal mit de trein naor Rolde om in het zand te speulen en bie de kiosk van uutbater Plest wat lekkers te halen. In de jaoren zestig werd d'r zelfs autocross reden.
Eeuwenlang had de wind vrij spel op de veule zandgronden in Drenthe. Ok in Rolde: zelfs de Brink in het dörp lag onder het zand. Dat gaf overlast veur het dörp en de boeren. De Boermarke, eignaor van dizze gronden veur algemeen gebruuk, stelde daorum zandheren an om de gevolgen van het stuiven te beperken. Deur bosanleg en intensievere landbouw raakte het zand later bedekt mit vruchtbare grond en kon de natuur heur gang gaon.
Ok de NSB kwam hier. In de jaoren van het nationaalsocialisme hield de partij op de zandverstuiving massabijeenkomsten, waor onder aanderen partijleider Anton Mussert sprak.
Nao jaoren van verwaarlozing was de verstuiving dichtgruid en haost vergeten, tot ergernis van veul Roldenaren. In 2016 besloten de Boermarke Rolde, Stichting Dorpsbelangen Rolde en het Rolder Historisch Gezelschap heur saomen te herstellen. Veurdat het wark begon, werd het terrein grondig onderzocht. Bie de zandvlakte staot een informatiebord.
