In dat plan staot wat d'r gebeuren mot en mit welk geld. Het wark in het beekdal begint naor verwachting an het ende van 2027, nadat het veurlopige ontwerp de kommende maonden uutwarkt is tot een definitief ontwerp. Het veurlopige ontwerp is op woensdag 11 maart besproken op een inloopbijeenkomst in Café De Amer in Amen, en het definitieve ontwerp kriegen de betrokkenen te zien veurdat het vaststeld wordt. Dit jaor worden ok de vergunningen veurbereid en giet de grondruil wieder.
Het Amerdiep, ien van de beken in het gebied van de Drentsche Aa, is ooit rechttrokken, zodat de landbouw het water sneller kwiet kon. Daordeur droogde de natuur in de umgeving uut en nam wiederop de kans op wateroverlast toe. As het dal het water weer langer vastholdt, wordt die kans kleiner. Ok mot het water schoner worden, onder meer veur de winning van drinkwater in het Drentsche Aa-gebied.
“Deur het Amerdiep weer natuurlijker in te richten, holden wie water langer vast op de plek waor het valt. Dat helpt bie extreme regen én bie droogte. Zo warken wie an een watersysteem dat beter veurbereid is op klimaatverandering,” zegt Anja Woortman, bestuurder van het waterschap.
In het beekdal mot ruumte kommen veur natte graslanden, moeras en bos, waor insecten, vissen, amfibieën en vogels van leven. Natuurgebieden raken zo beter mit mekaor verbonden, waordeur planten en dieren zich ok makkelijker verspreiden kunnen. Veur de boerenbedriefen rond de beek kieken provincie en waterschap of de kavels beter liggen kunnen, onder meer deur grond te ruilen.
Grondeignaors en umwonenden praoten sinds de start in 2022 mit, an de keukentafel, op bijeenkomsten in de streek en in schetssessies. Naor anleiding daorvan binnen onder meer een paar houtwallen anders intekend, om overlast van muggen te veurkommen.