"D'r wordt te hard reden, is te veul verkeer en het moet veiliger veur fietsers en voetgangers", zegt Arno van der Enden van Royal HaskoningDHV tegen RTV Drenthe. Neist de 30-kilometerzone kommen de toegangsborden van Rolde wat meer naor binnen te staon, en kriegt de weg in het midden een deurlaopende hobbel. "De hobbel in het midden van de weg is 'overrijdbaar', maor wel waarneembaar", zegt Van der Enden. "Dat alles moet zorgen veur een ander gevoel as ie het dörp in ridt."
"Ik zie dat het lukt is bewust vertragende maatregelen te realiseren. Daor bin ik zeker blij mit", zegt Ben Ernens, veurzitter van Dorpsbelangen Rolde. Fietsers moeten volgens hum wel beter beschermd worden. "Zij kriegen niet altied op de juiste wieze rugdekking, as zij zich tussen het autoverkeer mengen moeten."
Ernens wil ok dat d'r naor het verkeer in het hiele dörp keken wordt. "Ik zol het waarderen as Royal Haskoning van de gemeente opdracht kriegt om alles in één keer te doen."
Kruising mit de Tumuliboslaan
Ok de kruising van de Asserstraat mit de Tumuliboslaan wordt anpakt. Daor kwamen in december 2023 al tiedelijke maatregelen: een waarschuwingsbord mit verkeerslichten en een adviessnelheid van 40 kilometer per uur. D'r waren plannen om zes eiken langs de weg te kappen veur een beter zicht, maor in het veurlopige ontwerp blieven ze staon. Volgens Van der Enden wordt de straot zölf verlegd om de kruising veiliger te maken.
Nog gien definitief ontwerp
"Wie zitten nog an het begin", zegt Christa Schaap van de gemeente Aa en Hunze over het veurlopige ontwerp. Ze wil d'r nog vaak mit inwoners over praoten: "Wie moeten dit nog veul vaker doen, om het goeie gesprek te voeren. Wie willen het hoogst haalbare, zodat iedereen zich op een manier vertegenwoordigd voelt in de plannen."
De plannen heuren bie het mobiliteitsplan van de gemeente, dat in september besproken wordt. "Het is noe an de gemeente zölf om mit een definitief ontwerp te kommen, waor ok de gemeenteraad nog wat van vinden moet", zegt Ernens. Volgens Schaap is d'r nog veul wark te doen veurdat d'r op straot wat verandert. "Wie gaon de Asserstraat op acht plekken anpakken. Daor moet flink wat geld veur beschikbaar steld worden. Ik hoop dat wie over twee jaor meer weten en naor een definitief ontwerp gaon."
