Van het verkeer dat via de N33 naor Assen zol moeten rieden, kiest volgens Dorpsbelangen 60 procent veur de weg deur Rolde.
De gemeente Aa en Hunze hef al maatregelen nomen. Bie gevaarlijke oversteekplaatsen, zoas op de Asserstraat, staon waarschuwingslichten en borden. D'r wordt ok praot over snelheidsremmende maatregelen, zoas slingers in de weg.
Dorpsbelangen vindt dat niet genog en wil dat d'r niet allennig naor de Asserstraat keken wordt, maor ok naor de andere deurgaonde wegen in het dörp, zoas het stuk deur het dörpshart tot an de op- en afritten van de N33 net buten Rolde. Veural wil Dorpsbelangen snelheidsremmende maatregelen op die wegen. Veurzitter Ben Ernens denkt an drempels of andere obstakels, zodat automobilisten langzamer rieden moeten. "Pas dan worden auto’s echt ontmoedigd om de weg deur Rolde te nemen", zegt Ernens.
Ien van de belangriekste oorzaken is volgens Dorpsbelangen dat de rondweg om Assen an de kant van Rolde nooit afmaakt is. Daordeur giet het verkeer deur het dörp. Dorpsbelangen vindt dat buurgemeente Assen Rolde zo mit een probleem opzadelt, en vraogt ok de provincie Drenthe om het an te pakken.
In de petitie vraogt Dorpsbelangen de gemeente en andere betrokken partijen om in actie te kommen. Ie kunt hum tekenen op petities.nl.
