De fietsbrug ligt al ruum dertig jaor in de fietsroute deur het veengebied. Omdat bie inspecties bleek dat de draagconstructie deels antast is, komt d'r een hielemaol nieje brug. Die kriegt antislip en een opstaonde rand, zodat fietsers en wandelaars d'r veiliger overhen kunnen.
Het wandelpad bie Deurze naor de olde schans het Poepenhemeltje giet veur een deel over holten vlonders deur het natte beekdal. Deur hoog water, stroming en slijtage raakte een stuk van dat vlonderpad zo beschadigd dat het afsloten worden moest. Daorveur in de plaots komt een nij, breder vlonderpad van ongeveer 150 meter, waorop wandelaars mekaor makkelijker passeren kunnen.
Tiedens het wark laot Staatsbosbeheer bezoekers ter plekke weten wat wel en niet toegankelijk is. Mit vraogen over de brug kunnen luu terecht bie boswachter Linde Veldhoen (hartvandrenthe@staatsbosbeheer.nl), mit vraogen over het vlonderpad bie boswachter Jolijn Meier (drentscheaa@staatsbosbeheer.nl).
Beide projecten heuren bie een ronde van onderhold en vernieuwing die Staatsbosbeheer in Drenthe uutvoert an bruggen, vlonderpaden, uutkiekpunten en routes. Veul daorvan is tientallen jaoren geleden anlegd en mot deur intensief gebruuk en deur weer en wind vervangen of flink opknapt worden.