Het overschot komt veural deur bezuinigingen die de gemeente de aflopen jaoren samen mit de raad közen hef en deur extra geld van het Rijk, waordeur de begroting veur 2026 en 2027 structureel sluitend is. Veur het tekort in 2028 en 2029 moeten de raad die in maart 2026 közen wordt en het nieje college een oplossing vinden.
Toen het college de begroting op woensdag 1 oktober presenteerde, noemde wethouder Kiena ten Brink (financiën) het gien eenvoudige opgave om heur rond te kriegen.
“Wie laot een sluitende begroting achter, maor geeft tegeliek ok eerlijk an dat d'r richting 2029 nog een tekort overblif. Dat vraogt om nieje keuzes van de volgende raad en het volgende college,” zee Ten Brink.
In de begroting staon weinig nieje plannen, omdat d'r bezuinigd is en om de nieje raad ruumte te laoten. Wel veranderde de raad de begroting mit vier amendementen, over een kwaliteitsimpuls veur fietspaden, de ijs- en skeelerbaan in Gieten, mitdoen an een burgerpanel en een vrijwilligersfonds.
Daornaost steunde de raad zeuven moties. Die gaon over een ende an ‘gerommel in de bodem’, de mentale weerbaarheid van jongeren, Repair Cafés, brede duurzaamheid, een onderzoek naor een multifunctioneel centrum in Gasselte, het sneller mogelijk maken van woningdeling en houtstook.
Ok de belastingvoorstellen veur 2026 kregen de steun van de hiele raad. Ze gaon onder meer over de onroerendezaakbelasting, de afvalstoffenheffing, de rioolheffing en de leges, en daornaost over de toeristenbelasting veur 2027.