Toen d'r een stevige regenbui viel, zöchten handelaren en bezoekers beschutting in de Ebbinge-tent, die dankzij de Boermarke dit jaor groter was. Ok daor werd mit handjeklap handeld. Tussen de peerden ston de landbouw- en groenbeurs, en wieder waren d'r een warenmarkt, de karmis en peerdenshows. In de feesttent speulden onder aanderen Partyband Heer en Meester en Mark Doldersum.
‘Rieks zien pries’, die elk jaor ter nagedachtenis an de Rolder veearts Rieks Hatzmann uutreikt wordt veur het meest markante peerd op de markt, gong dit keer naor een viefjaorige appaloosamerrie uut Kollumerzwaag.
De marktdag sloot een feestweke af die donderdag 4 september begon, mit as thema ‘Een Roldermarkt vol PaardenKracht’. Op die eerste aovend ston Ter Land, Ter Zee en Op de Brink veur het eerst op het programma. De 27 teams, veul van hen op versierde fietsen die ze zölf maakt hadden, moesten over een parcours op de Brink de bel an het ende zien te halen, en volgens organisator OVVR lagen sommigen nao twee meter al in de waterbak. Luc Oosting van Team Techniko was het snelst, in 3,92 seconden.
Zaoterdagaovend trok veur het eerst in tien jaor weer een praalwagenparade deur het dörp, ter ere van het 240-jaorig bestaon van de markt. Vief buurtverenigingen hadden een wagen bouwd, en de Jan Thiesschool dee mit mit een TT-wagen, omdat de TT dit jaor honderd jaor bestaot. Meteen daornao volgde de bedriefenparade.
De buurtverenigingen uut de olde gemeente Rolde streden de hiele weke om de Roldermarktbokaal, mit punten uut de meerkamp en de playbackshow. Schepersgoorn won zundagaovend de playbackshow mit Dark Horse van Katy Perry, maor de bokaal gong naor de Steenackershoek, die ien punt meer haalde as De Hoorns. De Naobers werd derde.