Burgemeester Anno Wietze Hiemstra speldde Siegers de versierselen op in Eetcafé Hegeman, waor zien vrouw, zien zoon en een grote groep vrienden en bekenden bie waren. Een lintje kwam veur Siegers niet hielemaol as een verrassing, maor een ridderorde wel, schrieft de Rolderpost.
Siegers is sinds 1995 actief in het faunabeheer, in Drenthe en daorbuten. Hij zat in de besturen van wildbeheereenheden en van de Faunabeheereenheid Drenthe en warkte daor onder meer mit an het beheer van de reeën. Ok legde hij de basis veur de Drentse valwildregeling en hielp hij een systeem ontwikkelen waorin beheergegevens vastlegd worden. Zien kennis geeft hij deur as docent en examinator bie Stichting Jachtopleidingen Nederland en as mentor van nieje jagers.
Wolf is al tientallen jaoren actief veur het dörpsleven en het naoberschap in Amen en de Broekstreek. Zo is hij betrokken bie de toneelvereniging en de Uitvaartvereniging Rolde-Eext en omstreken, bie Dorpshuis De Eekhof en bie wandelactiviteiten.
In hiel Aa en Hunze kregen zeuven inwoners een onderscheiding, van wie Siegers as ienige tot Ridder benoemd werd. Behalve Wolf werden ok Henk Vedder, Ben Verwoerd, Piet Wolters, Evalien Krans-Kors en Jacob Wolf Lid in de orde. Bie hun afscheid uut de gemeenteraad werden Roelof Brands uut Rolde en Bertus Reinders uut Grolloo eerder al Lid in de Orde van Oranje-Nassau, meldt de Rolderpost.