De gemeente reikt de munt uut an bedriefen en organisaties die in Aa en Hunze worteld en gruid binnen, en die al lange tied wat betekenen veur de gemeente en heur inwoners. Sipma is pas de tweede ontvanger, nadat verleden jaor het dörpshuus in Annen de eerste munt kreeg.
“Wat klein begon, is in een eeuw tied uutgruid tot een modern en toonaangevend familiebedrief mit landelijke en internationale activiteiten. Deur de jaoren hen hef het bedrief zich steeds opnieuw weten uut te vinden, mit behold van de sterke binding mit Aa en Hunze,” zee Hiemstra bie de uutreiking, tekende de Rolderpost op.
Het bedrief begon in Rolde, toen Former Sipma, de grootvader van de huidige eignaors, op 12 februari 1926 een kenteken kreeg veur zien eerste vrachtauto. Daormit vervoerde hij vee en aardappels om zien grote gezin te onderholden. De volgende generatie bouwde het bedrief wieder uut, tot broer en zus Former en Agnes Sipma het in 2015 overnamen van hun vader, Henk Sipma.
Former Sipma begon in 1993 as chauffeur en reed later negen jaor mit een eigen vrachtauto, veurdat hij in 2006 terugkwam in het familiebedrief. Zien zus Agnes warkte eerst bie de PTT en daornao bie PostNL.
