Special Olympics Nederland gunde de spelen, het grootste sportevenement in Nederland veur sporters mit een verstandelijke beperking, an Drenthe. Veurzitter Erik de Winter maakte de keuze bekend op een bijeenkomst mit Drentse wethouders.
De provincie en alle Drentse gemeenten warken mit an de organisatie, waorbie elke gemeente een aantal sporten veur heur rekning nimt. Ok sportclubs, vrijwilligers, maatschappelijke organisaties en bedriefen hebben an de kandidatuur mitwarkt. De spelen zölf worden organiseerd deur een stichting mit as veurzitter Jetta Klijnsma, die eerder commissaris van de Koning in Drenthe was.
“Mit dit evenement kriegen sporters echt de ruumte om te stralen. Zo gruit de aandacht veur inclusief sporten en kunnen nóg meer luu, ok mit een beperking, gaon bewegen!” zegt Klijnsma.
Bie Rolder Boys voetballen al tien jaor luu mit een lichamelijke of verstandelijke beperking, het zogeheten G-voetbal. Ok de KNVB-bekerfinales veur G-voetballers werden al twee keer bie de club speuld, waorbie volgens de Rolderpost ruum 250 sporters mit hun begeleiders naor Rolde kwamen.