De bestuurder was op zien navigatie afgaon en zo het natuurgebied in reden, over een vlonderpad van 100 meter dat allennig veur wandelaars en fietsers bedoeld is. Halverwege braken de holten planken onder de camper, waordeur die vast kwam te zitten.
De camper kon d'r niet zomaor mit een trekker uuttrokken worden, omdat het veen rond het pad een kwetsbaar natuurgebied is. Olie of andere stoffen uut de camper mochten daor niet in terechtkommen. Bovendien is het broedseizoen, en dan wordt d'r in natuurgebieden normaal gesproken niet warkt.
Staatsbosbeheer, dat eignaor is van het pad, schakelde een aannemer in. Eerst werden de kapotte planken weghaald en de gaten mit OSB-platen dichtmaakt, waorover vervolgens rijplaten legd werden. Daorna werd de camper opkrikt tot hij weer recht ston en langzaam achteruut van het pad reden, waornao de eignaor d'r zölf mit naor huus kon.
Bie Staatsbosbeheer kwamen zo'n dreihonderd e-mails en telefoonties binnen mit ideeën om de camper los te kriegen, onder meer mit hefkussens of trekpeerden. Het vaakst werd een Chinook-helikopter noemd, maor die zol de natuur te veul verstoren. Sommige aannemers kwamen uut eigen beweging langs mit rijplaten, en ok bie de gemeente Aa en Hunze meldden zich aannemers die helpen wilden. Omdat de boswachters deur alle telefoonties en e-mails haost niet meer an hun eigen wark toekwamen, vroeg Staatsbosbeheer om gien tips meer te sturen.
De fundering van het vlonderpad is niet beschadigd, zodat allennig de kapotte planken vervangen hoeven te worden. Wanneer dat gebeurt, is nog niet bekend. Tot die tied blif het pad dicht en wiest het Recreatieschap Drenthe andere routes an. Daornao giet het pad nog een keer dicht, dit jaor of begin 2027, veur een grote opknapbeurt die al pland ston.