De provincie warkt daorbie samen mit Rijkswaterstaat Noord-Nederland. Mit de extra rijbaan komt het verkeer makkelijker van de N33 af, waordeur de kans op files op die weg kleiner wordt. De busbaan an de zuudkant, naor het OV-knooppunt Gieten, wordt verlengd zodat bussen in de ochtend- en aovendspits langs de file rieden kunnen. Of d'r ok an de noordkant van het verkeersplein een busbaan kommen kan, onderzoekt de provincie nog.
Bie de afslag Gieten, op de Oelenboom, staon noe barriers die veurkommen moeten dat automobilisten in de file op de N34 veurdringen. Die worden vervangen deur een geleiderail, omdat dat overzichtelijker is.
De nieje situatie blif zo tot de fly-over bie het verkeersplein klaor is, naor verwachting in 2030. An het ontwerp daorvan wordt nog warkt.
“Wie willen niet wachten op de anleg van de fly-over, maor noe al stappen zetten,” zegt gedeputeerde Henk Jumelet.
Elders op de N34, tussen Zuidlaren en De Punt en tussen Exloo en Borger, kommen an beide kanten van de weg verharde bermen en een inhaalverbod. Daor wordt ok de griene markering op de weg breder, mit dubbele ribbels. Dat wark gebeurt tegeliek mit onderhold an de N34, en alle warkzaamheden, ok die bie Gieten, moeten uiterlijk in december 2026 klaor wezen.