In Geelbroek komt schoon, kalkriek grondwater umhoog, en daor is de natuur in het beekdal van de Drentsche Aa van afhankelik. Om dat water langer in het gebied te holden, binnen sloten dichtgooid of ondieper maakt en binnen d'r slenken en kades anlegd. Volgens de provincie Drenthe kan de Drentsche Aa daordeur beter tegen lange droge periodes en zware regen. Op den duur moet d'r een afwisseling van bos, struiken, moeras en grasland ontstaon.
Boeren rond het gebied vrezen dat een hoger grondwaterpeil ok hun percelen natter maakt, zodat ze in het veurjaor pas later het land bewarken kunnen en d'r in het naojaor eerder mit ophouden moeten, meldt de Rolderpost. Volgens boeren uut de buurt kan een kleine stieging van het peil de opbrengst al flink drukken; in sommige gevallen vrezen ze schade tot ongeveer 20 procent.
De projectorganisatie verwacht op grond van onderzoek gien nadeel veur de landbouw in de umgeving. Het water uut het natuurgebied wordt apart van dat van de landbouwgrond afvoerd, en kades beschermen huzen en percelen. De kommende jaoren wordt het grondwater wel meten, en veur schade die d'r toch komt, is een regeling troffen. Die afspraken binnen volgens de provincie in overleg mit boeren en umwonenden maakt. Bie de herinrichting ruilden grondeigenaren ok vrijwillig grond, waordeur de landbouwgrond noe beter verkaveld is.
“Geelbroek laot zien dat natuurontwikkeling, waterbeheer en het gebruuk van het landschap hand in hand gaon kunnen,” zegt gedeputeerde Henk Emmens.
Wandelaars kunnen het gebied in over nieje paden en een vlonderpad, en d'r is een nieje parkeerplaots op de kruising van de Esweg en de Geelbroekweg. Op de openingsdag gongen gidsen mit belangstellenden het gebied in.
De herinrichting is uutvoerd in opdracht van de provincie, binnen heur programma Natuurlijk Platteland. Staatsbosbeheer, Prolander, het Nationaal Park Drentsche Aa, IVN, de gemeenten Aa en Hunze en Midden-Drenthe, het waterschap Hunze en Aa's en de Bestuurscommissie Drentsche Aa warkten d'ran mit. Geelbroek is onderdeel van het Natura 2000-gebied Drentsche Aa en van het Natuur Netwerk Nederland.